平，都可以浪漫。
不知道是我們太易滿足，還是因為我們負擔不起貴價生活，接受現實而產生的想法，事源於某天的對話⋯⋯
她：「其實唔使用太多錢去拍拖，我哋都可以好開心。」
即管看看她這次的決心有多強，她之前也試過說要儲錢，但逛街或上網見到靚衫靚鞋，又忍不到手，開始了節儉生活才不過一星期，就破戒了。
我笑她定力不夠，她說：「今次唔同，之前係直頭咩都唔做唔買，但而家係改變口味。」
她連例子也懶得舉了，以行動證明，約會時沒有嚷著要去尖沙咀的貴價餐廳，反而拉我到街口的茶記叫了一個常餐；飯後依然要吃甜品，但沒有到甜品舖點一個幾十元的朱古力窩夫，而是站在豆腐花舖前，跟我捧著碗吃得同樣甜蜜。
她： 「諗返以前我哋真係好大使呀……」
我： 「咁又唔係嘅，一開頭拍拖畀貴啲好正常！」
她： 「餐餐都食到好貴，我仲要你同我去食甜品。」
我： 「個個拍拖都係咁㗎啦！」
她： 「由而家開始人哋還人哋，我哋唔可以再係咁，我唔係細路女唔使食好嘢買貴嘢先覺得同你一齊係開心，係幸福。」
我： 「哦，想儲錢結婚咁話喇喎？」
她： 「你講㗎咋！」
她： 「畀我試啖你嗰碗！」
我： 「咪一樣係豆花……」
她： 「平時都係咁樣交換試㗎嘛！」
我： 「咁我餵妳啦！睇下會唔會甜啲！」
她： 「今餐平過以前好多囉！兩個人都唔使一百蚊，平時淨係甜品都差唔多……」
我： 「唔會覺得慘咗好多咩？」
她： 「所以我一陣要買啲嘢獎勵自己！」
她如常走進了平日必到的時裝店，卻沒有一袋二袋滿載而歸，而只拿了一包綁頭髮的橡筋到收銀處。
她：「已經好滿足喇！一啲都唔慘，細水長流嘅生活係咁㗎啦！」
我們開始穿得比平日樸素，我只穿一件Uniqlo淨色T-shirt牛仔褲，她從衣櫃底找回很多沒穿很久的裙子。她說已經不捨得幾百元買一件衫，我笑說我們老了，無力追趕潮流。
這種更平淡的相處方式，讓我們在燈紅酒綠的鬧市中顯得更平凡，只是某街角一對毫不起眼的情侶，但平價的浪漫卻不平庸，只是我們自知無法追求奢侈的物欲生活，而逐點逐點築起一個「你若安好，便是晴天」的二人世界。
*** 莎比亞書展新書：《最後一分鐘－愛情》7月20號 白卷出版社 1AA02攤位首賣
***簽名會：23/7 星期六 7:00pm 1AA02攤位
Search